Free Fodder Seed Kit Scheme- ರೈತರಿಗೆ ಉಚಿತ ಮೇವಿನ ಬೀಜ ಕಿಟ್ ವಿತರಣೆ | ಅರ್ಜಿ ಸಲ್ಲಿಸುವ ವಿಧಾನ ಸಂಪೂರ್ಣ ಮಾಹಿತಿ

ಉಚಿತ ಮೇವಿನ ಬೀಜಗಳ ಕಿಟ್ ವಿತರಣೆ ಯೋಜನೆಯಡಿ (Free Fodder Seed Kit Scheme) ರೈತರು ಬೀಜದ ಕಿಟ್ ಪಡೆಯುವುದು ಹೇಗೆ? ಅರ್ಜಿ ಸಲ್ಲಿಸುವ ವಿಧಾನ, ಅರ್ಹತೆ, ಲಾಭಗಳ ಸಂಪೂರ್ಣ ಮಾಹಿತಿ ಇಲ್ಲಿದೆ…

ಹೈನುಗಾರಿಕೆ (Dairy Farming) ಇಂದು ಗ್ರಾಮೀಣ ಆರ್ಥಿಕತೆಯ ಹೃದಯ ಆಗಿದೆ. ಹಸು-ಎಮ್ಮೆಗಳಿಂದ ದೊರೆಯುವ ಹಾಲೇ ಸಾವಿರಾರು ರೈತ ಕುಟುಂಬಗಳ ನಿತ್ಯದ ಆದಾಯದ ಪ್ರಮುಖ ಆಧಾರವಾಗಿದೆ.

ಆದರೆ ಇತ್ತೀಚಿನ ದಿನಗಳಲ್ಲಿ ಪಶು ಆಹಾರದ ಬೆಲೆ ಭಾರೀ ಏರಿಕೆಯಾಗಿರುವುದರಿಂದ, ಹೈನುಗಾರರಿಗೆ ಜಾನುವಾರುಗಳನ್ನು ಪೋಷಿಸುವುದೇ ದೊಡ್ಡ ಸವಾಲಾಗಿ ಪರಿಣಮಿಸಿದೆ. ಹಿಂಡಿ, ಬೂಸಾ, ಪಶು ಆಹಾರಗಳ ದುಬಾರಿ ಬೆಲೆ ರೈತರ ಲಾಭವನ್ನು ಕಡಿಮೆ ಮಾಡುತ್ತಿದೆ.

ಈ ಸಮಸ್ಯೆಯನ್ನು ಮನಗಂಡಿರುವ ಕರ್ನಾಟಕ ಸರ್ಕಾರ, ಹೈನುಗಾರ ರೈತರ ನೆರವಿಗೆ ಮುಂದಾಗಿ ‘ಮೇವಿನ ಕಿರು ಪೊಟ್ಟಣಗಳ ವಿತರಣೆ ಯೋಜನೆ’ (Free Fodder Seed Kit Scheme) ಜಾರಿಗೆ ತಂದಿದೆ. ಪಶುಸಂಗೋಪನಾ ಇಲಾಖೆಯ ಮೂಲಕ ಅನುಷ್ಠಾನಗೊಳ್ಳುತ್ತಿರುವ ಈ ಯೋಜನೆಯಡಿ, ರೈತರಿಗೆ ಸುಧಾರಿತ ತಳಿಯ ಮೇವಿನ ಬೀಜಗಳನ್ನು ಸಂಪೂರ್ಣ ಉಚಿತವಾಗಿ ವಿತರಿಸಲಾಗುತ್ತದೆ.

ಇದನ್ನೂ ಓದಿ: Kandaya Ilakhe Pension Yojane – ಕಂದಾಯ ಇಲಾಖೆಯ ಪಿಂಚಣಿ ಯೋಜನೆಗಳು: ಯಾರಿಗೆ ಎಷ್ಟು ಪಿಂಚಣಿ? ಅರ್ಜಿ ಹೇಗೆ? ಸಂಪೂರ್ಣ ಮಾಹಿತಿ

Free Fodder Seed Kit Scheme ಎಂದರೇನು?

ಈ ಯೋಜನೆಯ ಮುಖ್ಯ ಉದ್ದೇಶ ರೈತರು ಹೊರಗಿನಿಂದ ದುಬಾರಿ ಪಶು ಆಹಾರ ಖರೀದಿಸುವ ಅವಶ್ಯಕತೆಯನ್ನು ಕಡಿಮೆ ಮಾಡುವುದು. ತಮ್ಮದೇ ಜಮೀನಿನಲ್ಲಿ ಪೌಷ್ಟಿಕಾಂಶಯುಕ್ತ ಹಸಿರು ಮೇವು ಬೆಳೆದು, ಜಾನುವಾರುಗಳಿಗೆ ಉತ್ತಮ ಆಹಾರ ಒದಗಿಸಲು ರೈತರನ್ನು ಪ್ರೋತ್ಸಾಹಿಸುವುದುರೀ ಯೋಜನೆಯ ಗುರಿ.

ಪಶುಸಂಗೋಪನಾ ಇಲಾಖೆ ಖಾರಿಫ್ (ಮುಂಗಾರು) ಮತ್ತು ರಬಿ (ಹಿಂಗಾರು) ಹಂಗಾಮಿಗೆ ತಕ್ಕಂತೆ, ಉತ್ತಮ ಉತ್ಪಾದನೆ ನೀಡುವ ಮೇವಿನ ಬೀಜ ಗಳಕಿಟ್‌ಗಳನ್ನು ರೈತರಿಗೆ ಉಚಿತವಾಗಿ ವಿತರಿಸುತ್ತದೆ.

ಯಾವೆಲ್ಲ ಮೇವಿನ ಬೀಜಗಳು ಉಚಿತವಾಗಿ ಸಿಗುತ್ತವೆ?

ಈ ಯೋಜನೆಯಡಿ ರೈತರಿಗೆ 1 ರಿಂದ 5 ಕೆಜಿ ವರೆಗೆ ಮೇವಿನ ಬೀಜಗಳ ಕಿಟ್ ನೀಡಲಾಗುತ್ತದೆ. ಇದರಲ್ಲಿ ಸಾಮಾನ್ಯವಾಗಿ ಈ ಕೆಳಕಂಡ ಮೇವಿನ ಬೀಜಗಳನ್ನು ನೀಡಲಾಗುತ್ತದೆ:

• ಆಫ್ರಿಕನ್ ಟಾಲ್ ಮೆಕ್ಕೆಜೋಳ
• ಲುಸರ್ನ್ (ಕುದುರೆ ಮಸಾಲೆ)
• ಬರ್ಸೀಮ್
• ಓಟ್ಸ್
• ಚೈನೀಸ್ ಕ್ಯಾಬೇಜ್
• ಜೋಳದ ಸುಧಾರಿತ ತಳಿಗಳು

ಈ ಎಲ್ಲಾ ಬೀಜಗಳು ಹೆಚ್ಚು ಪೌಷ್ಟಿಕಾಂಶ ಹೊಂದಿದ್ದು, ಕಡಿಮೆ ಅವಧಿಯಲ್ಲಿ ಹೆಚ್ಚಿನ ಹಸಿರು ಮೇವು ನೀಡುವ ಸಾಮರ್ಥ್ಯ ಹೊಂದಿವೆ.

ಇದನ್ನೂ ಓದಿ: Narega Kuri Shed – ಕುರಿ ಶೆಡ್ ನಿರ್ಮಾಣಕ್ಕೆ ರೂ.70,000 ಸಹಾಯಧನ | ಅರ್ಜಿ ಸಲ್ಲಿಕೆಯ ಸಂಪೂರ್ಣ ಮಾಹಿತಿ…

ರೈತರಿಗೆ ಸಿಗುವ ಪ್ರಮುಖ ಲಾಭಗಳು

ಹಾಲಿನ ಉತ್ಪಾದನೆ ಹೆಚ್ಚಳ: ಗುಣಮಟ್ಟದ ಹಸಿರು ಮೇವನ್ನು ತಿನ್ನಿಸುವುದರಿಂದ ಜಾನುವಾರುಗಳ ಆರೋಗ್ಯ ಸುಧಾರಿಸುತ್ತದೆ. ಇದರ ಪರಿಣಾಮವಾಗಿ ಹಾಲಿನ ಪ್ರಮಾಣ ಮತ್ತು ಗುಣಮಟ್ಟ ಎರಡೂ ಹೆಚ್ಚಾಗುತ್ತದೆ.

ಪಶು ಆಹಾರ ವೆಚ್ಚದಲ್ಲಿ ಉಳಿತಾಯ: ಹೊರಗಿನಿಂದ ಹಿಂಡಿ-ಬೂಸಾ ಖರೀದಿಸುವ ಅಗತ್ಯ ಕಡಿಮೆಯಾಗುತ್ತದೆ. ಇದರಿಂದ ತಿಂಗಳಿಗೆ ಸಾವಿರಾರು ರೂಪಾಯಿ ಉಳಿತಾಯವಾಗುತ್ತದೆ.

ರೈತರ ಆದಾಯ ಹೆಚ್ಚಳ: ಹಸು-ಎಮ್ಮೆಗಳ ಹಾಲಿನ ಇಳುವರಿ ಹೆಚ್ಚಿದಂತೆ, ಹಾಲಿನ ಮಾರಾಟದಿಂದ ದೊರೆಯುವ ಆದಾಯವೂ ಹೆಚ್ಚಾಗುತ್ತದೆ.

ಸ್ವಾವಲಂಬಿ ಹೈನುಗಾರಿಕೆ: ತಮ್ಮ ಜಮೀನಲ್ಲೇ ಮೇವು ಬೆಳೆಯುವ ಮೂಲಕ ರೈತರು ಪಶು ಆಹಾರಕ್ಕಾಗಿ ಇತರರನ್ನು ಅವಲಭಿಸದೇ ತಾವೇ ಬೆಳೆಯುವ ಮೂಲಕ ಸ್ವಾವಲಂಬಿಗಳಾಗುತ್ತಾರೆ.

ಮೀಸಲಾತಿಗೆ ಅನುಗುಣವಾಗಿ ಬೀಜ ವಿತರಣೆ ವ್ಯವಸ್ಥೆ

ಸಮಾಜದ ಎಲ್ಲಾ ವರ್ಗದ ರೈತರಿಗೆ ಈ ಯೋಜನೆಯ ಲಾಭ ತಲುಪುವಂತೆ ಸರ್ಕಾರ ಮೀಸಲಾತಿಯನ್ನು ನಿಗದಿಪಡಿಸಿದೆ: ಮೀಸಲಾತಿ ವಿವರ ಈ ಕೆಳಗಿನಂತಿದೆ:

• ಮಹಿಳಾ ರೈತರಿಗೆ: 30%
• ಪರಿಶಿಷ್ಟ ಜಾತಿ (SC): 16%
• ಪರಿಶಿಷ್ಟ ಪಂಗಡ (ST): 7%
• ಅಲ್ಪಸಂಖ್ಯಾತರು ಹಾಗೂ ಸಾಮಾನ್ಯ ವರ್ಗದ ರೈತರಿಗೂ ಆದ್ಯತೆ ನೀಡಲಾಗುತ್ತದೆ.

ಅರ್ಹತಾ ಮಾನದಂಡಗಳು

ಈ ಯೋಜನೆಯ ಲಾಭ ಪಡೆಯಲು ರೈತರು ಈ ಅರ್ಹತೆಗಳನ್ನು ಪೂರೈಸಬೇಕು:

• ಅರ್ಜಿದಾರರು ಕರ್ನಾಟಕ ರಾಜ್ಯದ ನಿವಾಸಿಯಾಗಿರಬೇಕು.
• ಮೇವು ಬೆಳೆಯಲು ತಮ್ಮ ಹೆಸರಿನಲ್ಲಿ ಕನಿಷ್ಠ ಪ್ರಮಾಣದ ಕೃಷಿ ಭೂಮಿ ಇರಬೇಕು.
• ಕನಿಷ್ಠ 2 ಜಾನುವಾರುಗಳು (ಹಸು ಅಥವಾ ಎಮ್ಮೆ) ಇರಬೇಕು. ಹೈನುಗಾರರಿಗೆ ಮೊದಲ ಆದ್ಯತೆ.
• ಒಂದು ಬಾರಿ ಕಿಟ್ ಪಡೆದ ರೈತರು, ಮತ್ತೆ ಅರ್ಜಿ ಸಲ್ಲಿಸಲು ಒಂದು ವರ್ಷ ಕಾಯಬೇಕು.

ಇದನ್ನೂ ಓದಿ: Grama One Application- ಗ್ರಾಮ ಒನ್ ಕೇಂದ್ರ ಸ್ಥಾಪನೆಗೆ ಅರ್ಜಿ ಆಹ್ವಾನ | ಪಿಯುಸಿ ಪಾಸಾದವರಿಗೆ ಉದ್ಯೋಗಾವಕಾಶ

ಅರ್ಜಿ ಸಲ್ಲಿಸುವ ವಿಧಾನ ಹೇಗೆ?

ಈ ಯೋಜನೆಗೆ ಆನ್‌ಲೈನ್ ಅರ್ಜಿ ವ್ಯವಸ್ಥೆ ಇಲ್ಲ. ರೈತರು ಖುದ್ದಾಗಿ ಅರ್ಜಿ ಸಲ್ಲಿಸಬೇಕು. ನಿಮ್ಮ ಹತ್ತಿರದ ಪಶು ಚಿಕಿತ್ಸಾಲಯ ಅಥವಾ ತಾಲೂಕು ಪಶುಸಂಗೋಪನಾ ಇಲಾಖೆ ಕಚೇರಿಗೆ ಭೇಟಿ ನೀಡಿ.

ಅಲ್ಲಿ ‘ಮೇವಿನ ಕಿರು ಪೊಟ್ಟಣ ವಿತರಣೆ ಯೋಜನೆ’ಗೆ ಸಂಬಂಧಿಸಿದ ಅರ್ಜಿ ಫಾರ್ಮ್ ಪಡೆಯಿರಿ. ಅರ್ಜಿಯನ್ನು ಸರಿಯಾಗಿ ಭರ್ತಿ ಮಾಡಿ, ಅಗತ್ಯ ದಾಖಲೆಗಳೊಂದಿಗೆ ಅಧಿಕಾರಿಗಳಿಗೆ ಸಲ್ಲಿಸಿ.

ಪಶುವೈದ್ಯಾಧಿಕಾರಿಗಳು ನಿಮ್ಮ ಜಮೀನು ಹಾಗೂ ಜಾನುವಾರುಗಳನ್ನು ಪರಿಶೀಲಿಸುತ್ತಾರೆ. ಅರ್ಹತೆ ಇದ್ದರೆ ಮೇವಿನ ಬೀಜ ಕಿಟ್ ಅನ್ನು ಉಚಿತವಾಗಿ ವಿತರಿಸಲಾಗುತ್ತದೆ.

ಅರ್ಜಿಗೆ ಅಗತ್ಯ ದಾಖಲೆಗಳ ಪಟ್ಟಿ

• ಆಧಾರ್ ಕಾರ್ಡ್
• ಜಮೀನಿನ ಪಹಣಿ (RTC)
• ರೇಷನ್ ಕಾರ್ಡ್ (ಇದ್ದರೆ)
• ಬ್ಯಾಂಕ್ ಪಾಸ್‌ಬುಕ್ ಪ್ರತಿಲಿಪಿ
• ಜಾತಿ ಪ್ರಮಾಣ ಪತ್ರ (SC/ST/OBC ಇದ್ದಲ್ಲಿ)
• ಇತ್ತೀಚಿನ ಪಾಸ್‌ಪೋರ್ಟ್ ಗಾತ್ರದ ಫೋಟೋ

ಸಹಾಯವಾಣಿ ಮತ್ತು ಸಂಪರ್ಕ ಮಾಹಿತಿ

ಹೆಚ್ಚಿನ ಮಾಹಿತಿಗಾಗಿ ರೈತರು ಪಶುಸಂಗೋಪನಾ ಇಲಾಖೆಯ ಸಹಾಯವಾಣಿ 82771 00200 ಸಂಖ್ಯೆಗೆ ಸಂಪರ್ಕಿಸಬಹುದು. ಅಥವಾ ಇಲಾಖೆಯ ಅಧಿಕೃತ ವೆಬ್‌ಸೈಟ್ ಮೂಲಕವೂ ಮಾಹಿತಿ ಪಡೆಯಬಹುದಾಗಿದೆ.

‘ಮೇವಿನ ಕಿರು ಪೊಟ್ಟಣಗಳ ವಿತರಣೆ ಯೋಜನೆ’ ಹೈನುಗಾರ ರೈತರಿಗೆ ಆರ್ಥಿಕವಾಗಿ ಬಲ ನೀಡುವ ಅತ್ಯಂತ ಉಪಯುಕ್ತ ಯೋಜನೆಯಾಗಿದೆ. ನಿಮ್ಮ ಜಾನುವಾರುಗಳ ಆರೋಗ್ಯ ಹಾಗೂ ಹಾಲಿನ ಉತ್ಪಾದನೆ ಹೆಚ್ಚಿಸಿಕೊಳ್ಳಲು ಈ ಅವಕಾಶವನ್ನು ತಪ್ಪದೇ ಬಳಸಿಕೊಳ್ಳಿ.

ಅಧಿಕೃತ ವೆಬ್‌ಸೈಟ್: ahvs.karnataka.gov.in

kannadajana.org